Dowladda Jabuuti oo sheegtay in ciidamadeedu aanay kala baxaynin Soomaaliya

by Hassan Ali | Wednesday, Oct 26, 2016 | 116 views

26,October,2016(SofoNews) Danjiraha dowladda Jabuuti ufadhiya Soomaliya, Aden Xasan Aden ayaa shaaca ka qaaday in weerarkii ismiidaaminta ahaa ee shalay kooxaha nabad diidka Al-shabaab ku qaadaan xarun ay ciidamada AMISOM ee Jabuuti ku lahaayeen duleedka Magaalada Beledweyne uusan waxba ka badali doonin howlaha nabad ilaalinta ee ay ciidamada Jabuuti u joogaan gudaha Soomaaliya.

Safiirka ayaa sheegay in ay sii wadayaan dadaallada ay ku nabadeynayaan Soomaaliya, ilaa iyo inta laga cirib tiraayo haraadiga kooxaha nabad diidka ee ku dhuumaaleysanayo qaar ka mid ah gobollada dalka Soomaaliya.

Aden Xassan Aden ayaa sidoo kale shacabka Soomaaliyeed ugu baaqay in ay la shaqeeyaan ciidamada dowladda iyo kuwa AMISOM si looga hortago qatarta ay kooxaha nabad diidka umaleegayaan shacabka Soomaaliyeed ee aanan waxba galabsan.

Hadalkaan ka soo baxay safiirka dowladda Jabuuti ee Soomaaliya ayaa ku soo beegmaya xilli shalay maleyshiyaad ka tirsan ururka Al-shabaab ay weeraro isugu jira ismiidaamin iyo qaraxyo ay ku qaadeen xarun ay ciidamada jabuuti ku la haayeen galbeedka magaalada Beledweyne ee xarunta gobolka Hiiraan.

 

Like it? Share it!

Leave A Response